مجلس عسكري .. أنا مصري أنا ضده
بدون أي مقدمات إحنا نازلين يوم 27 مايو عشان إحنا مصريين نفسنا نشوف تغيير في البلد نفسنا نشوف مصر حلوة نفسنا نحس إن مصر بقت بتاعتنا كشعب مش ناخدها من عبد الناصر ونديها للسادات ونديها لمبارك ويا عالم هتروح لمين وإحنا يا ولداه واقفين بنتفرج .
إحنا نازلين يوم 27 عشان دم الألف مصري اللي ماتوا ميروحوش هدر .. واللي قتلهم قاعد في شرم الشيخ اللي 90% من المصريين بيحلموا يروحوها فتخيل لما سفاح يكون محبوس في مكان زي دة وإخواتنا بتوع السفارة الإسرائيلية وبتوع 9 إبريل محبوسين وهيتحاكموا عسكريا مع غيرهم يبقى إحنا لازم ننزل ومنرجعش المرة دي غير لما الآية تتقلب .
إحنا نازلين يوم 27 عشان نقول للعسكر إننا بقينا زياطين .. أة زياطين أي حد مش عاجبنا هنروح التحرير وهنملى كل ميادين مصر وإنتوا مش عاجبينا لأننا سلمنالكوا البلد وكنا فاكرين إنكوا واقفين في صفنا
إحنا نازلين يوم 27 عشان بعد الثورة الواحد افتكر إن كرامة المصري رجعت تاني لكن الظاهر إننا كنا غلطانين .. لما سلاح الأمن المركزي يترفع في وش مصري عشان يحمي علم إسرائيل فإحنا معملناش حاجة ويبقى لازم ننزل يوم 27 .
إحنا نازلين يوم 27 عشان الظاهر إن ظباط الشرطة لسة حارقهم إن أساس مهنة الظابط هي حماية الناس مش إنهم يقولوله يا باشا وياخد رشاوي من هنا وهنا .. نازلين عشان نطهر البلد من عناصر الشرطة الفاسدة واللي مش عاجبه عنده تأشيرات كندا وعنده تأشيرات أمريكا ” الله يمسيك بالخير يا شيخ يعقوب ” .
إحنا نازلين يوم 27 عشان نقول الجيش إحنا صبرنا كتير إنما للصبر حدود .. لو مش قادر تكمل ومحروج من محاكمة الناس دي ..هنشيل عنك الحرج وهات لنا مجلس رئاسي مدني نعرف نتفاهم معاهم ويحاكموا الفاسدين ويرجعولنا فلوسنا وطبعا هيطهروا القضاء اللي أكيد فيه عناصر فاسدة .
إحنا نازلين يوم 27 مايو عشان لينا مطالب كتير متحققتش .. ونازلين عشان المجلس العسكري اتضح إنه ميفرقش عن مبارك في شئ دة كهرب المعتصمين وعذبهم وكشف على عذرية بنات وحبس مدونين وقهر حرية الفكر وحبس متظاهرين ودافع عن علم إسرائيل !! هو حسني مبارك بعينه بغباوته بشكله العكر .
المجلس العسكري اشتغلنا في فزاعة الإسلاميين عشان الناس تخاف من الديمقراطية وتسب للثورة وتقوله نارك يا جيش ولا جنة الديمقراطية .. منفعتش اشتغل في فزاعة الاقتصاد عشان الناس تسب للثورة ويبقوا الثوار هما الثورة المضادة ودة كان واضح من كلمة طنطاوي في حفل تخرج دفعة شرطة
وطبعا ما شاء الله استخدم الإعلام في ترويج حملاته دي كلها زي ما الكتاب قال قصدي زي ما مبارك قال .. بذمتكوا حاسين بالتغيير ؟
يا مجلس يا عسكري لو عايز تركب على الثورة كنت تقولنا كدة من الأول كنا قضيناها لجان شعبية ومصر مليانة رجالة تحمي ثورتها .. أما أسلوب الأفاعي دة مينفعش معانا
وفي النهاية ياريت الشباب اللي نازل يوم 27 ميحاولش يلتفت لأي إحباطات جاية من بتوع حزب الكنبة .. إفتكروا أيام الثورة لو كانوا عملوا استفتاء لإخلاء الميدان كان نعم لإخلاء الميدان كانت هتكتسح ، إحنا مكملين وحلال عليهم تلوين الشارع وعلم مصر ويتصوروا مع الدبابات وكل الحاجات اللطيفة دي بعد ما نخلص إن شاء الله
ليست هناك تعليقات:
إرسال تعليق